यूट्यूबबाट हट्यो ‘छ एकान छ’, पाइरेसी गर्ने पक्राउ

पाइरेसीको खबर संचारमाध्यममा फैलिएपछि यसले खुबै चर्चा पायो । यूट्यूबमा हालिएको ‘छ एकान छ’ को करिब ५० मिनेटको दृश्य भने अहिले हटाइएको छ । प्रहरीले अनुसन्धान थालेपछि सिनेमाको करिब ५० मिनेटको अस्पष्ट दृश्य हटाइएको हो । यसैबिच यूट्यूबमा भिडियो अपलोड गर्ने सन्दिप मगर नामका व्यक्तिलाई प्रहरीले उनकै घरबाट पक्राउ गरेको छ । उनलाई हाल हनुमानढोका प्रहरीले बयान लिइरहेको निर्माता तथा नायक दीपकराज गिरीले जानकारी दिए । उनी करिब २० बर्षको रहेको बताइएको छ । निर्माता दीपकराज गिरीले पत्रकार सम्मेलन गरेर सबैकुराको  जानकारी गराउने बताए । पौष २६ गतेबाट देशभरका हलमा प्रदर्शनमा आएको यो हाँस्य सिनेमाले १ करोड माथिको ग्रस कलेक्शन गरिसकेको छ । -