बार्सलोना र एथ्लेटिको मड्रिडले अंक बाँडे

 स्पेनिस ला लिगा फुटबलमा लिग लिडर बार्सिलोनाले एथ्लेटिको मड्रिडसँग अंक बाँडेको छ । शनिबार राति भएको खेलमा गोलरहित बराबरी खेल्दै बार्सिलोना र एथ्लेटिको मड्रिडले अंक बाँडेका हुन् ।

बराबरीपछि बार्सिलोना १९ खेलबाट ५० अंकका साथ शीर्ष स्थानमा छ भने समान अंक जोडेको एथ्लेटिको मड्रिड गोल अन्तरका आधारमा दोस्रो स्थानमा छ । तेस्रो स्थानमा रहेको रियल मड्रिडको भने ४४ अंक छ र उसले एक खेल कम खेलेको छ ।

घरेलु मैदानमा भएको खेलको पहिलो हापमा एथ्लेटिको मड्रिडका डिएगो कोष्टको प्रहार फ्रेममा पर्न सकेन भने आर्डा ट्युरानको भली बार्सिलोनाका गोलरक्षक भिक्टर भाल्डेसले बचाए ।

दोस्रो हापको सुरुमा मैदान प्रवेश गरेका मेस्सीको प्रहार थोरै बाहिर हुँदा बार्सिलोनाका समर्थकहरु चुकचुकाएका थिए । खेल बार्सिलोनाले ६९ प्रतिशत आफ्नो नियन्त्रणमा लिएपनि गोल भने गर्न सकेन ।