मेस्सी फेरि उत्कृष्ट खेलाडीको शीर्ष स्थानमा

९ पुस, काठमाडौं । बार्सिलोनाको अर्जेन्टिनी स्टार लिओनल मेस्सी उत्कृष्ट सय खेलाडीको सूचीमा शीर्ष स्थानमा रहन सफल भएका छन् । बेलायती पत्रिका द गार्जियनले जनमत र निर्णायकहरुको मतका आधारमा सन् २०१३ का उत्कृष्ट एक सय खेलाडीको सूची सार्वजनिक गरेको हो ।

२०१२ मा सूचीको शीर्ष स्थानमा मेस्सी यो वर्ष पनि पहिलो नम्बरमै छन् । चोटका कारण मेस्सी यो सिजन धेरै समय मैदान बाहिर छन् ।

दोस्रो स्थानमा रियल मडि्रडका क्रिष्टियानो रोनाल्डो छन् । गत वर्ष पनि उनी दोस्रो स्थानमा थिए । गत वर्ष पाँचौ स्थानमा रहेको जाल्टन इभ्राहिमोभिच तेस्रो स्थानमा उक्लिएका छन् भने २८ औं स्थानमा रहेका फ्राङ्क रिवेरी चौथो स्थानमा आइपुगेका छन् ।

गत वर्ष चौथो स्थानमा रहेको बार्सिलोनाका आन्द्रे इनिष्टा पाँचौं स्थानमा झर्दा नेयरमा भने १३ औं स्थानबाट छैटौं स्थानमा उक्लिएका छन् । २०१२ मा ४० औं स्थाामा रहेका ग्यारेथ बेल यो वर्ष सूचीको सातौं नम्बरमा परेका छन् ।

गत वर्ष तेस्रो स्थानमा रहेका जाभी भने आठौं स्थानमा झरेका छन् । २१ औं स्थानमा रहेका लुईस स्वरेज नवौं तथा ११ औं स्थानमा रहेका सर्जिओ एगयुरो दशौं स्थानमा उक्लिएका छन् ।