एसिसी महिला प्रिमियर ट्रफी क्रिकेटः नेपालको विजयी सुरुवात

एसिसी महिला प्रिमियर ट्रफी क्रिकेट प्रतियोगितामा नेपालले इरानलाई २२१ को फराकिलो रनअन्तरले पराजित गर्दै विजयी सुरुवात गरेको छ ।

थाइल्यान्डको चियाङमाइस्थित जिमखानामा मंगलबार भएको प्रतियोगितामा टस हारेर पहिले ब्याटिङको निम्तो पाएको नेपालले निर्धारित ४० ओभरमा ६ विकेट गुमाउँदै २८४ रन बनायो ।

यस्तै नेपालले दिएको २८५ रनको लक्ष्यलाई पच्छाएको इरान ३० दशमलव ५ ओभरमा ६३ रन बनाउँदै अलआउट भयो ।

नेपालको जितमा सरिता मगरले सर्वाधिक ७२ रनको योगदान दिइन्. भने सीता मगरले ६१ रन जोडिन् ।

यसैगरी निरा राजोपाध्यायले ४७, सरस्वती चौधरीले १२, रुबीन क्षेत्रीले ९, शोभा आलले ८, ममता चौधरीले ५ तथा ममता थापाले एक रनको योगदान दिएका थिए ।

यसैगरी बलिङतर्फ नेपालकी सीता मगरले ४ विकेट लिइन् भने रुबीना क्षेत्रीले २ तथा सरिता मगरले एक विकेट लिएकी थिइन् ।