चीनमा एकजना युवाले आफै बाघको सिकार बन्न खोजेर यस्तै सनकी चाला देखाएका छन्

मान्छेलाई सनक चढेपछि अनेक-अनेक गर्न मन लाग्छ । चीनमा एकजना युवाले आफै बाघको सिकार बन्न खोजेर यस्तै सनकी चाला देखाएका छन् ।

२७ वर्षीय याङ जिन्हाइले चिडियाखानाभित्र रहेका बाघको सामु पुगे । बाघलाई जिस्क्याए अनि आफूलाई खान प्रेरित गरे । तर, संयोग चिडियाखानाका कर्मचारी र दर्शकले उनलाई उद्धार गरे ।
चिडियाखानाभित्र थुनिएका बाघको गुणस्तरीय जीवनयापनमा ध्यान नदिइएको उनको दावी छ । ‘बाघलाई राम्रो आहार दिनुपर्छ’ खोरभित्र हाम फाल्दै उनले भने ‘उनीहरुलाई मेरो शरिर भोजनको लागि समर्पित गर्दछु ।’

परिवारजनका अनुसार यी युवा लामो समयदेखि डिप्रेसन रोगको उपचार गरिरहेका छन् ।

दक्षिण पश्चिमी सिजुवान प्रान्तमा उनले सुरक्षा गार्डको जागिर गरेका सुरुका बखत निकै उत्साहित थिए । तर, केही समयमै आफू सो जागीरबाट सन्तुष्ट हुन नसकेको उल्लेख गर्दै उनी पि्रन्टिङ कारखानामा काम गर्न पुगे । त्यहाँ पनि उनी खुसी रहन सकेनन् ।
उनमा हतासपन बढ्दै गयो । त्यसपछि स्थानीय चिडियाखाना पुगे र त्यहाँ राखिएका बाघको प्राकृतिक खुसी खोसिएको धारणा बनाए । बाघले प्राकृतिक रुपमा सिकार गर्न पाउनुपर्ने अधिकार कुण्ठित भएको भन्दै आफ्नै शरिर भोजनको लागि अर्पण गर्ने घोषणा गरे ।

प्रत्यक्षदर्शी फेङ ली का अनुसार ती युवा खोरभित्र हाम फालेपछि बाघहरु नै अचम्मित भएका थिए । खोरमा भाले र पोथी बाघ थिए । खोरभित्र मानिस हाम फालेपछि पोथी बाघ चकित हुँदै भागेको थियो । ‘ऊ बाघको लागि भोजन बन्न चाहेको थियो’ ली ले भने । आफ्नो भोजन गर्न उसले भाले बाघको मुहारमा मुक्का बजारेको थियो । यसबाट आक्रोशित भालेले उसलाई चिथोरेको थियो ।

चिडियाखानाका कर्मचारी र दर्शकहरुले आगोको लप्का बालेर उसको उद्धार गरेका थिए । आगोका लप्का देखेपछि बाघ त्रसित हुने गर्दछ ।