बेपत्ता जहाज सम्पर्क विच्छेदपछि पनि चार घन्टा उडेको अमेरिकी दाबी

 बेपत्ता मलेसियन एयरलाइन्सको विमानबारे खोजबिन गरिरहेको अमेरिकी अनुसन्धानकर्ताहरुको टोलीले हवाई उड्डयन कक्षसँगको अन्तिम सम्पर्कपछि पनि उक्त जहाज चार घन्टा उडेको हुनसक्ने सम्भावना व्यक्त गरेको छ। बिहीबारसम्म दर्जन देशका ४२ पानीजहाज र ३९ विमानले उक्त बेपत्ता विमानको खोजी गरिरहेका छन्।

रोयटर्सले वाल स्ट्रिट जर्नललाई उद्धृत गर्दै लेखेअनुसार अमेरिकी उड्डयन अनुसन्धानकर्ता र सुरक्षा अधिकारीले बोइङको इन्जिनबाट स्वतः प्राप्त हुने जानकारीका आधारमा उक्त जहाज जम्मा पाँच घन्टा उडेको बताएका छन्। मलेसियाको राजधानी क्वालालम्पुरबाट आइतबार सखारै बेइजिङतर्फ उडेको उक्त जहाज एक घन्टापछि नै सम्पर्कविच्छेद भएको थियो। यस आधारमा हवाई उड्डयन कक्षसँग सम्पर्क टुटेको अर्को चार घन्टासम्म उक्त जहाज उडेको थियो।

आधुनिक हवाई इतिहासकै रहस्यमय उक्त दुर्घटनाको सत्यतथ्य छैँटौँ दिनसम्म पनि हात लाग्न सकेको छैन। जहाज हराएको छैटौ दिन थुप्रै विमानहरुले चीन र नजिकका समुद्रमाथि उक्त जहाजको खोजी गरिरहे पनि कुनै सुराकी लाग्न सकेको छैन।

न्युयोर्क टाइम्सका अनुसार मलेसियाली सेनाले उक्त जहाजको आपतकालीन संकेत सुरुमा बेवास्ता गरेको स्वीकार गरेको छ। संकटमा परेपछि उक्त विमानले पठाएको आपतकालीन संकेत मलेसियाली सेनाको उड्डयन कक्षमा आए पनि उनीहरुले त्यस्ता संकेतमा ध्यानै दिन सकेनन्।

अमेरिकी अनुसन्धानकर्ताको पछिल्लो सूचनाअनुसार यदि उक्त जहाज पाँच घन्टा उडेको भए थप २२ सय माइल टाढा पुगेको हुनुपर्छ। त्यत्ति दूरीमा उक्त जहाज पाकिस्तान, हिन्द महासागरका कुनै भुभाग वा उत्तरतर्फ उडेको भए मंगोलियासम्म पुग्नसक्छ।

अमेरिकी अनुसन्धानकर्ताको यो सूचनालाई मलेसियन एयरलाइन्सका अधिकारीले पुष्टि गरेका छैनन्। त्यस्तै बोइङ ७७७ को इन्जिन उत्पादनकर्ता रोल्स रोयस कम्पनीकी वरिष्ठ अधिकारीले यसबारे कुनै प्रतिक्रिया दिएनन्। यसअघि मलेसियन एयरलाइन्सले हवाई सम्पर्क विच्छेद भएपछि रोल्स रोयसको इन्जिनले पनि संकेत पठाउन छाडेको जानकारी दिएका थिए।

मलेसियामाथि दबाब
जहाज दुर्घटनाबारे कुनै तथ्य पत्ता लगाउन नसकेपछि चीनले मलेसियालाई खोजी कार्यको समन्वयमा सुधार ल्याउन दबाब दिएको छ। जहाजमा चढेकामध्ये दुई तिहाइ यात्रु चिनियाँ थिए। चिनियाँ प्रधानमन्त्री ली केयाङले बेइजिङमा पत्रकार सम्मेलनमा बोल्दै ‘सम्बन्धित पक्ष’सँग समन्वयको माग गरेका छन्। त्यस्तै चिनियाँ उड्डयन प्रमुखले मलेसियाबाट सहज सूचना चाहेको बताएका छन्। दुर्घटनाबारे मलेसियाली छानबिनको आलोचना भइरहेको छ।

भियतनामी र मलेसियाली जहाजले समुद्रमाथि खोजबिन गरिरहेका छन् भने एउटा स्टाटेलाइटले समुद्रमा तीनवटा शंकास्पद वस्तु तैरिरहेको तस्बिर खिचेको छ। तस्बिर खिचेको स्थान विमानले सम्पर्क गुमाएको ठाउँनजिक छ।

दक्षिण चिनियाँ समुद्रनजिकको उक्त स्थानमा जहाजहरुले खोजबिन गरिरहे पनि कुनै पनि वस्तु भेट्न नसकेको खोजी कार्यमा सँगै रहेका रोयटर्सका एक पत्रकारले बताए। मलेसियन हवाई सेना प्रमुखले भने बुधबार थाईल्यान्डको फुकेटनजिकैै जहाजजस्तै एउटा संदिग्ध वस्तु राडारको संकेतमा आएको बताएका छन्।

बोइङ ७७७ अहिलेसम्मकै उत्कृष्ट सुरक्षा रेकर्ड भएको विमान मानिन्छ।